无綫艺人萧正楠、曹永廉合作拍摄节目《兄弟大茶饭》，周围煮嘢食畀唔同剧组品尝，之前佢哋去完新疆沙漠煮好嘢畀一班《包青天再起风云》嘅剧组同事食；日前，佢哋又去咗深圳整龙凤寿司冧《白色强人》嘅演员，唐诗咏、李佳芯、郭晋安同幕后工作人员都有份食，见到佢哋夹手夹脚，阿廉揸起刀嚟又有板有眼。

问可有演员投诉难食？阿廉话：“我哋啲烧味寿司同沙冰好好味㗎！大家畀面梗系话好食啦！其实真系OK㗎！之前我哋都整过花胶响螺鸡煲添！”阿廉坦言自己做过厨房，自己识切嘢，而萧正楠亦做过日本餐厅，所以整寿司绝对冇难度。阿廉仲话：“以前喺屋企我系自己煮饭嘅，不过依家等姐姐搞啦！”原来阿廉早排去咗老人院整嘢食畀公公、婆婆叹，佢话：“嗰一集最有意义，有啲九十几岁婆婆，一边食一边同我哋倾偈。”

难忘与耆英边倾边食

至于现时正为《美女厨房》担任主持的萧正楠可谓甚有口福，讲到《兄弟大茶饭》，佢咁话：“一切如火如荼！特别之处系去啲偏远地方探剧组，其实最有意思嗰一次系去探老人院，我哋煮汉堡畀佢哋食，最重要系有人关心佢哋，同佢哋倾偈又唱歌畀佢哋听，佢哋就开心，你知啦！阿廉好少做善事，我都一样啦！哈哈！所以呢集系好有意义嘅！”